आरंभ

सप्रेम नमस्कार !

सध्या मी माझ्या दुसऱ्या खात्याच्या स्टेट्स वर आणि काही समूहात ' मला समजलेला , किवां न समजलेला देव , अल्लाह , गॉड वगैरे हे शीर्षक असलेली माझ्या प्रत्यक्ष जीवनावर आधारित लेखमाला लिहिण्यास सुरवात केली असून त्याचे ६१ भाग पूर्ण झालेले आहेत , अजून किमान २०० भाग होतीलच . माझ्या व्यसनाधीनतेच्या खेरीज , अनेक सामाजिक समस्या , जनमानसातील वेगवेगळे धर्मवाद , जातीवाद , अश्या अनेक विषयांना स्पर्श करणाऱ्या या मालिकेला वाचकांचा उदंड प्रतिसाद मिळतोय या बद्दल आपले सर्वांचे आभार ! आपला हा प्रतिसाद माझी लेखनक्षमता वाढण्यासाठी खूप प्रेरणादायी आहे . सदर लेखमाला लिहीत असतांना अनेकांना व्यसनमुक्तीचे नेमके उपचार काय असतात ? व्यसनाधीनता आणि व्यसनमुक्तीची नेमकी प्रक्रिया कशी आहे ? सुधारणेचे प्रमाण किती असते ? वगैरे कुतूहल निर्माण होणे स्वाभाविक आहे कारण आज सगळीकडेच व्यसनाधीनतेची समस्या उग्र स्वरूप धारण करत असून पाहता पाहता एखाद्या कुटुंबाची वाताहत होताना अनेकांनी पहिले आहे व जर आपल्याला काही मदत करता आली तर आवडेल असेही बऱ्याच जणांनी मनोगत माझ्याकडे व्यक्त केले आहे . म्हणूनच आमच्या मैत्री व्यसनमुक्ती केंद्रात दाखल होण्यापासून ते उपचार घेऊन सुटी मिळेपर्यंत नेमके काय कामकाज चालते , व्यसनमुक्तीच्या प्रक्रियेत प्रत्यक्ष व्यसनी व्यक्तीचा आणि पालकांचा सहभाग कसा असावा , व्यसनमुक्ती केंद्रातील वातावरण , तेथील गमतीजमती , वगैरे सगळ्या बाबी सांगणारी ऐक नवीन लेखमाला सुरु करण्याचा विचार आहे . ' एका बेवड्याची डायरी ' या शीर्षकाची माझी ऐक लेखमाला २००३ साली लोकमत या मान्यवर दैनिकाच्या ' सखी ' य साप्तहिक पुरवणीत प्रकाशित झाली होती सुमारे ४० भाग प्रकाशित झाल्यावर ही मालिका काही तांत्रिक कारणांमुळे पुढे लिहू शकलो नव्हतो . 

सदर ' एका बेवड्याची डायरी ' ही लेखमाला फेसबुकवर सुरु करणार आहे तेव्हा कृपया जास्तीत वाचकांनी सदर लेखमाला वाचावी हो नम्र विनंती . या नवीन लेखमालेत ऐक व्यसनी व्यसनमुक्ती केंद्रात उपचारांसाठी दाखल असून तेथील त्याच्या दैनंदिनी बद्दल त्याच्याच शब्दात तो लिखाण करतोय अशी मध्यवर्ती कल्पना आहे !